Bakı, 16 aprel, AZƏRTAC
UEFA Çempionlar Liqasında 1/4 final mərhələsinin növbəti iki oyunu keçirilib.
Parisdə yerli “PSJ” komandası turnirin favoritlərindən olan “Barselona”nı qəbul edib.
Görüşün 13-cü dəqiqəsində Lionel Messinin fərqlənməsinə qapı dirəyi mane olsa da, beş dəqiqə sonra argentinalı ulduzun gözəl ötürməsini qola çevirən Neymar oyunda hesabı açıb - 0:1. Qarşılaşmada üstünlüyü ikinci hissədə də davam etdirən qonaqlar 67-ci və 79-cu dəqiqələrdə Luis Suarezin qolları ilə hesab arasındakı fərqi üç topa çatdırıb. Lakin üç dəqiqə sonra Qregori van der Viel parislilərin təsəlli qolunu vurub - 1:3.
Turun digər oyunu da maraqlı idman mübarizəsi şəraitində keçib. Doğma meydanda “Bavariya”nı qəbul edən “Portu” 3:1 hesabı ilə qalib gəlib. Oyunun 3-ü dəqiqəsində almanların qapısına təyin olunan on bir metrlik cərimə zərbəsini dəqiq yerinə yetirən Rikardo Quareşma 10-cu dəqiqədə dubl edib -2:0. Qarşılaşmanın 28-ci dəqiqəsində “Bavariya”nın heyətində Tiaqo Alkantara hesab arasındakı fərqi azaldıb. Lakin ikinci hissədə də inamlı oyun nümayiş etdirən “Portu” 65-ci dəqiqədə Cekson Martinezin qolu ilə 3:1 hesablı qələbəni rəsmiləşdirib.
Xatırladaq ki, 1/4 final mərhələsinin ilk iki oyununda “Yuventus” “Monako”nu 1:0 hesabı ilə məğlub etmiş, Madrid derbisində - “Atletiko” və “Real” komandaları arasındakı görüşdə isə qapılara qol vurulmamışdı.