"Spartak"ın üzləşdiyi ardıcıl uğursuz nəticələrin səbəbkarı kimi göstərilən Murat Yakın Moskvanı tərk etməyə yaxındı.

ANS PRESS-in məlumatına görə, çalışdırıcının özü "Rusiyaya 10 aylıq gəzinti üçün gəlməmişəm" deməklə istefa vermək fikrində olmadığını bildirsə belə, komandanın ardıcıl uğursuzluqları vəziyyətin fərqli ssenaridə davam edəcəyinə işarədi. Həm "Spartak"a könül verən azarkeşlər, həm də klub bossları türk əsilli isveçrəli mütəxəssisin işindən narazıdı.

"Bazel"i böyük ümidlərlə "Spartak"a dəyişən Yakının işləri Rusiyada heç də qaydasında deyil. 36 xalla 7-ci sırada qərarlaşan "Spartak" avrokuboklardan kənar qala bilər. Bu isə Yakın üçün hər Rusiyadakı karyerasının sonu deməkdi. Son turda Kurban Berdıyevin çalışdırdığı "Rostov"a məğlubiyyət vəziyyəti daha da qəlizləşdirib.

Qeyd edək ki, Yakının mümkün əvəzləyiciləri sırasında Donetks "Şaxtyor"unu mövsümün sonunda tərk etməyə hazırlaşan məşhur rumıniyalı çalışdırıcı Mirça Luçeskunun da adı çəkilir. Onun adı Türkiyənin "Fənərbaxça" və "Beşiktaş" klublarıyla da yanaşı çəkilir.
Mənbə
ANS PRESS