Bakı, 9 aprel, AZƏRTAC
Dünya Boks Seriyası (WSB) liqasının 12-ci turu çərçivəsində aprelin 11-də Quba Olimpiya İdman Kompleksində “Baku Fires” ABŞ-ın “USA Knockouts” komandası ilə qarşılaşacaq.
AZƏRTAC xəbər verir ki, komandaların heyəti artıq müəyyənləşib. Belə ki, Murad Rabadanov (52 kq) Brent Riçard Veneqas, Albert Səlimov (60 kq) Karlos Balderas, Pərviz Bağırov (69 kq) Brayan Keballo, Mixail Dalqalivets (81 kq) Stiv Nelson, Haci Murtuzəliyev (91 kq-dan yuxarı) Kam Avesome ilə qarşılaşacaqlar.
Albert Səlimov bu görüşdə qələbə qazansa 2016-cı ildə keçiriləcək Rio-de-Janeyro Olimpiadasına vəsiqəni təmin edəcək. Onun rəqibi K.Balderas mövsüm ərzində 3 görüşdə qələbə qazanıb və hazırda reytinqdə 7-cidir.
Fərdi reytinqdə vəziyyətini yaxşılaşdırmaq üçün P.Bağırova da mütləq qələbə lazımdır. Milli komandamızın üzvünün bu mövsüm qeyri-sabit təsir bağışlayan B.Keballonu məğlub edə biləcəyi gözlənilir. Amerikalı boksçu 2 döyüşdə qalib gəlsə də, 3 dəfə rinqi məğlub tərk edib.
Bu həftə “B” qrupunda “Puerto Rico Hurricanes” doğma rinqdə “Astana Arlans”ı qəbul edəcək. “Argentina Condors” “Caciques Venezuela” klubu ilə qarşılaşacaq. “Rafako Hussars Poland” isə səfərdə “İtalia Thunder”in qonağı olacaq.