Bakı, 2 aprel, AZƏRTAC
Aprelin 2-də “AtaBank” ASC-nin dəstəyi ilə “AtaHolding” Şirkətlər Qrupunun və “Synergy Group” ASC-nin əməkdaşları arasında keçiriləcək ümummilli lider Heydər Əliyevin xatirəsinə həsr olunan mini futbol yarışının püşkü atılıb.
Bankdan AZƏRTAC-a bildiriblər ki, püşkün nəticəsinə əsasən, yarışda iştirak edəcək 16 komanda 4 qrupa bölünüb. Qrup mərhələsindən sonra ilk iki yeri tutacaq komanda dörddəbir finala vəsiqə qazanacaq.
Turnirə aprelin 4-də start veriləcək. “AzFar” stadionunda təşkil olunacaq yarış AFFA-nın hakimlər briqadası tərəfindən idarə ediləcək. Şənbə və bazar günləri keçiriləcək qrup mərhələsinin matçlarına aprelin 19-da yekun vurulacaq.
Yarışda ilk üç yerin sahiblərinə müvafiq olaraq 4000, 3000 və 2000 manat məbləğində pul mükafatları veriləcək. Turnirin ən yaxşı oyunçusu, bombardiri və qapıçısı seçiləcək idmançıların hər biri 500 manatla mükafatlandırılacaq.