"Biz Malta ilə oyunda komandadan irəliləyiş gözləyirik. Azərbaycanlı oyunçuların problemi istedadlarında yox, futbol mentalitetindədi. Biz çalışırıq əsl futbol oynayaq".

ANS PRESS-in məlumatına görə, bu sözləri milli komandamızın baş məşqçisi Robert Prosineçki deyib.

Baş məşqçi Xorvatiyanın “Sport 1Z” kanalına müsahibəsində Azərbaycan millisinin hədəflərindən də danışıb. Bildirib ki, komandanın gələcək məqsədi AVRO-2020-də oynamaqdı: "Bir neçə il ərzində Azərbaycan futbolu daha yüksək səviyyədə olacaq. Əsas məqsəd 2020-ci ildə keçiriləcək Avropa çempionatına hazır olmaqdı".

Prosineçki millimizin qrupdakı rəqibi olan Xorvatiya yığması barədə də fikirlərini açıqlayıb. O, həmvətənlərinin AVRO-2016-ya vəsiqə qazanacağına və orada layiqincə çıxış edəcəyinə inandığını deyib: "Xorvatiya ciddi futbol oynayır. Bunu İtaliya ilə görüşdə gördük. Bu komandadan razı qalmaq lazımdı. Çünki belə kiçik ölkədən bu qədər istedadlı futbolçu çıxır. Təkcə futbol yox, digər idman növlərini də bura aid etmək olar. Mən Xorvatiya millisinin Avropa çempionatının final mərhələsində iştirakını gözləyirəm".
Mənbə
ANS PRESS