Respublikadan partlayış və atışma xəbərləri gəlir

İnquşetiyada partlayışlar və silahlı hücumlar davam edir. Bölgədən hər gün yeni bir olayla bağlı xəbərlər gəlməkdədir. Lent.az-ın “İnterfaks” agentliyinə istinadən verdiyi məlumata görə, dünən gecə daha iki böyük partlayış baş verib.

Noyabrın 13-də axşam Nazran şəhərinin girişində qoyulan milis postu qumbara atanlardan və avtomatlardan atəşə tutulub. Postdakı milis əməkdaşları gizlənə biliblər. Hücum edənləri də tutmaq mümkün olmayıb.

Üstündən bir neçə saat keçəndən sonra naməlum şəxslər əvvəlcə İnquşetiya baş nazirinin müavini Bəşir Auşevə məxsus evi partladıblar. Nazrandakı Kurqannı küçəsində yerləşən ev tikilib başa çatmayıbmış və bu səbəbdən də evdə heç kim yaşamırmış. Maraqlıdır ki, bundan əvvəl də həmin evi yandırmağa cəhd ediblər və ev atəşə tutulub.

Bir qədər sonra isə İnquşetiyanın SSRİ-nin tərkibinə daxil olandan sonra ilk rəhbəri İdris Zyazikovun Nazranın mərkəzində ucaldılan abidəsi partladılıb. Nəticədə abidə tamamilə dağılıb. Xoşbəxtlikdən heç kim zərər çəkməyib. Güc strukturları qeyd ediblər ki, abidəni hələ 2006-cı ildə partlatmağa cəhd ediblər. O zaman partlayış nəticəsində heykələ yüngül ziyan dəyib.