Bakı, 19 mart, AZƏRTAC
“Synergy Group”un təşkilatçılığı ilə aprelin 16-da keçiriləcək, Vüqar Həşimovun xatirəsinə həsr olunacaq şahmat üzrə “Shamkir Chess-2015” super turniri ilə bağlı bir sıra məsələlər artıq həllini tapıb.
AZƏRTAC xəbər verir ki, ötən il olduğu kimi, bu il də canlı izlənəcək “Shamkir Chess-2015” üç dildə yayımlanacaq. Azərbaycan dilində partiyaları vaxtilə Vüqar Həşimovun məşqçisi olan, FİDE məşqçisi, Azərbaycanın əməkdar məşqçisi Anar Allahverdiyev və yeniyetmələr üzrə millinin məşqçisi, qrossmeyster Fərid Abbasov təqdim edəcək. Partiyaları rus dilində Vüqar Həşimovun sekundantı və məşqçisi Viorel İordakesku, ingilis dilində isə ukraynalı qrossmeyster, FİDE şərhçisi Evqeniy Miroşniçenko şərh edəcəklər.
Dünyanın ən güclü şahmatçılarından olan Maqnus Karlsen, Vişvanatan Anand, Vladimir Kramnik, Fabiano Karuana, Aniş Giri, Uesli Sou, Maksim Vaşi-Lagrav, o cümlədən azərbaycanlı qrossmeysterlər, Avropa çempionları Şəhriyar Məmmədyarov, Teymur Rəcəbov və Azərbaycan çempionatının son qalibi Rauf Məmmədov Şəmkir turnirində qalib adi uğrunda mübarizə aparacaqlar. Bu “Shamkir Chess-2015”in dünyada geniş yayımlanması üçün mükəmməl bir vasitə olacaqdır.
Yaxın günlərdə www.shamkirchess.az veb-səhifəsi yeni versiyada ictimaiyyətə təqdim olunacaq. Super turnir ilə bağlı ətraflı məlumat, şahmatçıların Şəmkirdə keçirdikləri vaxt və eyni zamanda, oyunları birbaşa izləmək üçün burada xüsusi pəncərə yaradılıb. Əlavə olaraq, www.chess.com veb-səhifəsi də aprelin 16-26-da bu turniri birbaşa izləmək imkanı yaradacaq.