Bakıda xarici şirkətin əməkdaşını binanın blokunda şil-küt etdilər. Milli.Az-ın məlumatına görə, İçərişəhər ərazisində yerləşən TTE Petrofac şirkətində təlimçi işləyən 47 yaşlı, Böyük Britaniya vətəndaşı Qrubbon Layle cinayətkarların hücumuna məruz qalıb.

O, Üzeyir Hacıbəyov küçəsində yaşadığı mənzilinə getmək istəyərkən blokda iki naməlum şəxs ona hücum edib. Onu bədəninə, sifətinə zərbələr vurmaqla yerə yıxıblar, sonra isə cibindən 225 manat, 300 dollar, 100 funt-sterlinq olan pul kisəsini götürərək qaçıblar. Q.Layle martın 16-da başına gələnlərlə bağlı polisə şikayət edib.

Səbail Rayon Polis İdarəsindən Milli.Az-a verilən məlumata görə, əcnəbi şirkət əməkdaşının döyülməsi ilə bağlı Cinayət Məcəlləsinin 180-cı (soyğunçuluq) maddəsi ilə cinayət işi başlanıb.

Anar Məmmədov
Milli.Az