“Gələn ilin büdcəsində sosial yönümlü məqsədlər üçün büdcə vəsaitinin 30-40% artacağı gözlənilir”.

Lent.az-ın məlumatına görə, bu açıqlamanı jurnalistlərə Milli Məclisin Sosial Siyasət Daimi Komissiyasının sədri Hadı Rəcəbli verib.

H.Rəcəblinin sözlərinə görə, 2009-cu ildə səhiyyəyə ayrılan vəsaitlər 32%, sosial müdafiəyə ayrılan vəsaitlər 33%, təhsilə ayrılan vəsaitlər isə 24% artacaq: “2009-cu ilin büdcəsi təmkinli, böhrana davamlı, sosial yönümlü və investisiya tutumlu büdcədir. Dünyada gedən maliyyə problemləri Azərbaycandan da yan keçməyə bilər. Ona görə də 2009-cu ilin büdcə xərcləri 2008-ci ilin büdcə xərclərindən 11,4% çoxdur”.

Komissiya sədri onu da bildirib ki, gələn il üçün yaşayış minimumu 84 manat civarında müəyyənləşib və minimum pensiyaların baza hissəsi 80 manata çatdırılacaq: “Azərbaycanda gələn il üçün orta aylıq əmək haqqı 353 manat müəyyənləşib. Bu da əvvəlki ilə nisbətən 26 faiz artım deməkdir. Həmçinin, gələn il səhiyyə sahəsində çalışan işçilərin əmək haqları 54% artacaq”.

Nigar Məmmədli