[ 06 Mart 2015 13:32 ]
Bakı – APA. Danimarka Olimpiya Komitəsi (DOK) Bakı-2015-də yarışacaq idmançılarının sayını açıqlayıb. Apasport.az saytının məlumatına görə, danimarkalılar iyunda Azərbaycanda keçiriləcək Avropa Oyunlarına 65 idmançı ilə gəlməyi planlaşdırırlar.
Komandanın şef-de-missionu Morten Rodtvit bildirib ki, bu idmançılar 17-yə yaxın idman növünü əhatə edəcək: “Avropa Oyunları 2016-cı ildə keçiriləcək Rio-de-Janeyro Yay Olimpiya Oyunlarına hazırlaşan bir neçə idmançı üçün əla sınaq yarışı olacaq. Bakıda nə qədər peşəkar atletlər çıxış edərsə, bir o qədər də Danimarka idmançılarının Olimpiadaya hansı səviyyədə hazırlıqlı olduqları müəyyənləşəcək”.
Qeyd edək ki, iyunun 12-28-də təşkil olunacaq Avropa Oyunlarında 20 idman növü üzrə yarışlar keçiriləcək.
