“Ermənistanın baş naziri Nikol Paşinyan təcrübəsiz
siyasətçidir. Onun açıqlamaları bunu sübut edir”.
Bu barədə Publika.az-a açıqlamasında Milli
Məclisin Müdafiə, təhlükəsizlik və korrupsiya ilə mübarizə
komitəsinin üzvü Aydın Mirzəzadə deyib.
A.Mirzəzadə qeyd edib ki, Paşinyanın Dağlıq Qarabağ münaqişəsindən
xəbəri yoxdur: “O hərbi xidmətdə olmayıb, lakin bu gün hərbi
məsələlər haqqında absurd fikirlər səsləndirir. Öz oğlunu hərbi
xidmət etmək üçün işğal altındakı Azərbaycan torpaqlarına göndərir,
digər tərəfdən, Qarabağı “müstəqil respublika” adlandırır və deyir
ki, “Azərbaycan Ermənistanla yox, Qarabağla danışıqlar
aparmalıdır”. Paşinyan özü-özünü təkzib etməklə məşğuldur”.
Milli Məclisin üzvü diqqətə çatdırıb ki, Azərbaycanın iqtisadi
qüdrəti, siyasi nüfuzu ən əsası güclü hərbi qüvvəsi Dağlıq Qarabağ
problemini həll etməyə imkan verir.
“Cənab Prezidentin açıqladığı kimi bir neçə gün bundan əvvəl
Ermənistan Silahlı Qüvvələrinə çox ciddi zərbələr endirildi. Aprel
hadisələri, Günnüt hadisəsinin təkrarı həmişə gözləniləndir. Bu
dəfə Azərbaycan Aprel hadisələrini təkrarlayarsa bu, artıq
Paşinyanın hakimiyyətdən getməsi ilə deyil, Ermənistan üçün çox
böyük ciddi və ağır nəticə ilə yekunlaşacaq”, - deyə o
bildirib.
