Bakı. 22 aprel. REPORT.AZ/ "Bakı 2015" I Avropa Oyunlarının növbəti idman elçisinin adı açıqlanıb. "Report"un məlumatına görə, polşalı dağ velosipedi idmançısı Maya Vloşçovska Oyunların idman elçisi olacaq.
O, Pekin-2008 Yay Olimpiya Oyunlarında dağ velosipedi idmanının kros-kantri proqramı üzrə qadınlar arasında keçirilmiş yarışın gümüş medalını, 2010-cu ildə isə eyni idman növü üzrə dünya çempionu adını qazanıb. İlk əhəmiyyətli qələbəsini 2003-cü ildə dağ velosipedi üzrə marafon yürüşünün dünya zirvəsinə yüksəlməklə əldə edən təcrübəli idmançı bu günə qədər dünya və Avropa çempionatlarında 22 medal əldə edib.
Bakı 2015-in əməliyyatlar üzrə baş direktoru Saymon Kleqq açıqlamasında bildirib ki, qadın velosipedçinin beynəlxalq idman elçisi kimi Oyunlara cəlb edilməsi ilk Avropa Oyunlarının əhəmiyyətinə daha bir bariz nümunədir və bu yay Bakıya gələcək idmançıların səviyyəsinin əyani göstəricisidir: “Karyerası boyunca Mayanın əldə etdiyi uğurlar onun dağ velosipedi idmanına bağlılığını nümayiş etdirir və iyun ayında Avropa Oyunlarında onun yarışlarda iştirakını səbirsizliklə gözləyirik”.
"Bakı 2015"in idman elçiləri mübarizə apardıqları idman növünü təmsil etməklə qitədə və sosial mediada həyata keçirilən marketinq kampaniyalarında Avropa Oyunlarının təbliğatında iştirak edəcəklər.
31 yaşlı Maya Vloşçovska Avropa Oyunlarında mübarizə aparacağım günü səbirsiziklə gözlədiyini deyib. O, Oyunların və dağ velosiped idmanının Avropada, eləcə də, bütün dünyada nüfuzunu artırmaq üçün əlindən gələni etməyə hazır olduğunu bildirib.
Qeyd edək ki, bugünədək stolüstü tennisçi Dimitri Ovçarov, yunan qılıncoynadan Vasiliki Vuqiuka, irlandiyalı boksçu Keti Teylor, britaniyalı taekvondoçu Ceyd Cons, fransalı bədii gimnast Kseniya Mustafayeva, danimarkalı avarçəkən Rene Holten Poulsen və Duşan Domoviç Bulut, Marko Saviç, Marko Zdero və Deyan Maystoroviçdən ibarət Serbiya 3x3 basketbol komandası "Bakı 2015"in idman elçiləri elan olunub.