Madrid, 15 aprel, AZƏRTAC 
Azərbaycanın mədəniyyət və turizm naziri Əbülfəs Qarayevin rəhbərlik etdiyi nümayəndə heyəti aprelin 14-15-də İspaniyanın paytaxtı Madriddə keçirilən Dünya Səyahət və Turizm Şurasının qlobal sammitində iştirak etmək üçün bu ölkədə səfərdədir.
Sammit çərçivəsində nazir BMT-nin Ümumdünya Turizm Təşkilatının (ÜTT) baş katibi Taleb Rifai ilə görüşüb.
Görüşdə bu il mayın 18-19-da Bakıda keçiriləcək 3-cü Ümumdünya Mədəniyyətlərarası Dialoq Forumu çərçivəsində Ümumdünya Turizm Təşkilatının dəstəyi ilə təşkil ediləcək turizmin mədəniyyətlərarası dialoqda roluna dair xüsusi sessiyanın son hazırlıq işləri müzakirə edilib. Keçiriləcək sessiyanın qaydaları, tərəfdaşlıq məsələləri, Azərbaycanın beynəlxalq layihələrdə iştirakı da söhbət zamanı diqqət mərkəzində olub.
Görüş zamanı Azərbaycan hökuməti ilə Ümumdünya Turizm Təşkilatı arasında üzv ölkədə turizm kadr potensialının gücləndirilməsi sxemi üzrə ekspertin təqdim olunması barədə saziş imzalanıb.
Görüşdə müzakirə mövzusu olan digər məsələ isə Azərbaycanın işğal olunmuş Dağlıq Qarabağ ərazisində turizm layihələrinin həyata keçirilməsindən yaranan narahatlıq olub. Əbülfəs Qarayeb bildirib ki, növbəti iclaslarda bu məsələ ciddi müzakirə olunacaq.
Xatırladaq ki, sammitin ilk günü mədəniyyət və turizm naziri BMT ÜTT tərəfindən təşkil olunan, dünyanın turizm nazirləri və qabaqcıl korporasiya və şirkətlərinin rəhbərləri arasında “dəyirmi masa” formatında görüşdə iştirak edib. O, ölkəmizin turizm imkanları, Ümumdünya Turizm Təşkilatına üzv ölkələrlə sıx əməkdaşlıq mövzusunda çıxış edib.
Aygün Əliyeva
AZƏRTAC-ın xüsusi müxbiri
Madrid