Bakı, 15 aprel, AZƏRTAC
Yaxın vaxtlarda Nizami Kino Mərkəzində C.Cabbarlı adına “Azərbaycanfilm” kinostudiyasında dövlət sifarişi ilə çəkilmiş “Dərs” bədii filminin təqdimatı keçiriləcək.
Nazirlikdən AZƏRTAC-a bildirilib ki, film məktəb həyatından, yeniyetmə məktəbli uşaqların qarşılıqlı münasibətlərindən, dostluğa və həyata baxışlarından, bu baxışların formalaşmasından bəhs edir.
Filmin ssenari müəllifləri Elza Ağayeva və Anastasiya Volkova, quruluşçu rejissorları Rafiq Əliyev və Cavid Təvəkkül, quruluşçu operatoru Rauf Qurbanəliyev, prodüseri Müşfiq Hətəmovdur.
Filmdə Bakı məktəbliləri Tamerlan Ağayev, Aliyə Əliyeva, Rəşid Əliyev, Ayna Zərbəliyeva və başqaları çəkiliblər. Bundan əlavə, ekran əsərində Nazim İbrahimov, Mənsurə Əhmədova, Rasim Cəfər və başqaları da rol alıblar.
Təqdimatdan sonra Bakıda və bölgələrdə filmin məktəblilər üçün kütləvi nümayişlərinin keçirilməsi planlaşdırılır.