London, 15 aprel, AZƏRTAC. 
Beynəlxalq sərgilər Azərbaycanın zəngin tarixi və mədəniyyətinin dünyada daha yaxından tanıdılması və təbliği üçün gözəl fürsətdir.
Bu sözləri Londona keçirilən beynəlxaql kitab sərgisində ölkəmizi təmsil edən Mədəniyyət və Turizm Nazirliyinin kitab dövriyyəsi və nəşriyyatlar ilə iş şöbəsinin baş məsləhətçisi Aslan Cəfərov AZƏRTAC-a müsahibəsində deyib.
Mötəbər tədbir haqqında ətraflı məlumat verən A.Cəfərov qeyd edib ki, ölkə nəşriyyatlarının və nəşr məhsullarının beynəlxalq sərgilərdə nümayişi respublikada aparılan böyük quruculuq prosesinin, elm, mədəniyyət və tarix nümunələrimizin dünya ictimaiyyətinə çatdırılmasında əhəmiyyətli rol oynayır. Bu sərgi nəşriyyat və informasiya sahəsində xarici tərəfdaşlar ilə əlaqələrin qurulması, Azərbaycanın zəngin mədəniyyətinin və sürətli inkişafının, Qarabağ həqiqətlərinin, “Baku-2015” Avropa Oyunlarının, IV Bakı Beynəlxalq Kitab Sərgi Yarmarkasının təbliği baxımından da mühüm əhəmiyyət kəsb edir.
A.Cəfərov diqqətə çatdırıb ki, sərgidə Mədəniyyət və Turimz Nazirliyinin dəstəyi ilə hazırlanan, Azərbaycanın milli mənəvi dəyərlərini, zəngin tarixini özündə əks etdirən kitablar nümayiş etdirilir. Sərgi ilə yaxından tanış olan insanlar Azərbaycan xalqının öz milli mənəvi dəyərlərinə sahib çıxmasını yüksək qiymətləndirirlər.
Orxan İsmayılov
AZƏRTAC-ın xüsusi müxbiri
London