Heydər Əliyev Fondu və Azərbaycanın İtaliyadakı səfirliyinin birgə təşkilatçılığı ilə Bakı-2015 İlk Avropa Oyunlarının Romada keçirilmiş təqdimat mərasiminin videosu yayılıb.

ANS PRESS həmin videonu təqdim edir.

Qeyd edək ki, Avropa Oyunlarının təqdimatı, həmçinin Yunanıstan, Almaniya, Türkiyə və Fransada keçirilib.

2015-ci ilin 12-28 iyun tarixlərində keçiriləcək Bakı-2015 Avropa Oyunları Avropa qitəsi üçün çoxsaylı idman növləri üzrə çox maraqlı və innovativ yarışlar olacaq.

Bakı-2015 Avropa Oyunları ümumilikdə 20 idman növü üzrə keçiriləcək: bunlardan 16-sı Olimpiya idman növü, dördü isə qeyri-olimpiya idman növü olacaq. Avropanın müxtəlif ölkələrindən 6 mindən çox idmançının 17 yarış günü müddətində öz ölkələrini təmsil edəcəyi gözlənilir.

On bir idman növü 2016-cı il Rio-de-Janeyro Olimpiya Oyunları üçün seçmə yarışlara imkan yaradacaq. Həmin idman növlərinə oxatma, yüngül atletika, boks, velosiped idmanı, atıcılıq, üzgüçülük, stolüstü tennis, taekvondo, triatlon, güləş və voleybol daxildir.

Avropa Oyunlarının keçirilməsi 2012-ci ilin dekabr ayında Avropa Olimpiya komitələri (AOK) tərəfindən Bakı şəhərinə həvalə olunub. Bakı Avropa Oyunları Əməliyyat Komitəsi (BEGOC) AOK ilə əməkdaşlı şəkildə Oyunları təşkil və idarə edəcək.

Mənbə
ANS PRESS