Qlobal maliyyə böhranı Həcc ziyarətinə getmək istəyənlərin sayının azalmasına səbəb olub

Bu il Həcc ziyarətinə gedəcək dindarların yola salınması və orada qarşılanması üçün hazırlıqlar artıq başa çatıb. Hazırda sonuncu vizalar alınır və noyabrın 22-də ziyarətçilərin ilk dəstəsi Bakıdan yola düşəcək.

Qafqaz Müsəlmanları İdarəsinin (QMİ) rəhbəri, bütün Qafqazın şeyxi Hacı Allahşükür Paşazadə jurnalistlərə açıqlamasında deyib ki, bu il dünyadakı maliyyə böhranı ilə bağlı bəzi çətinliklər yaranıb. Onun sözlərinə görə, bu il QMİ üçün ayrılmış 6 min nəfərlik zəvvar kvotası üzrə yerlərin bir qismi boş qalıb. Buna görə də nəzərdə tutulmuş təyyarələrdən 4-ü geri qaytarılıb. Buna görə də QMİ ziyana düşüb: “Həmin təyyarələri sifariş verəndə 25 faiz ödəmə aparmışdıq. Bundan başqa, 50-60 avtobus da geri qaytarılıb”.

Bununla belə, Azərbaycandan Həcc ziyarətinə getmək istəyənlərin sayı hələ dəqiqləşməyib.

Elxan SALAHOV