Bakı. 30 mart. REPORT.AZ/ Əmək və Əhalinin Sosial Müdafiəsi Nazirliyində (ƏƏSMN) sosial cəhətdən həssas əhali qruplarına sosial xidmətlərin təşkili, bu sahədə fəaliyyətin təkmilləşdirilməsi, əmək siyasəti və digər sahələrdə görülən işlərə və qarşıda duran vəzifələrə dair kollegiya iclası keçirilib. Bu barədə "Report"a nazirliyin İctimaiyyətlə əlaqələr şöbəsindən məlumat verilib.
Əmək və əhalinin sosial müdafiəsi naziri Səlim Müslümov bildirib ki, ölkədə "Sosial xidmət haqqında" qanuna uyğun olaraq, sosial xidmətlərin göstərilməsi ixtisaslaşmış vətəndaş cəmiyyətləri ilə birgə təşkil olunur: "Ötən il ƏƏSMN-in sosial xidmətlər üzrə elan etdiyi müsabiqələrdə 28 QHT qalib gəlib. Ümumilikdə keçən il QHT-lər tərəfindən 31 layihə icra olunub ki, onlardan 30-u bilavasitə xüsusi qayğıya ehtiyac duyan uşaqlarla bağlı olub. Həmin layihələr üzrə ümumilikdə 1933 nəfər sağlamlıq imkanları məhdud və ya çətin həyat şəraitində olan uşaq sosial xidmətlərlə təmin olunub. Həmçinin icra olunan layihələr çərçivəsində ölkənin 11 rayonunda günərzi qayğı mərkəzləri yaradılıb. Könüllülər də daxil olmaqla 140 nəfərin çalışdığı bu mərkəzlərin sosial xidmət göstərdikləri 330 nəfərdən çox uşağın 20 faizi sağlamlıq imkanları məhdud uşaqlar olub".
Nazir qeyd edib ki, hazırda ixtisaslaşmış QHT-lər tərəfindən göstərilən sosial xidmətlərin keyfiyyətinin, səmərəliliyinin və ünvanlılığının ölçülməsi üçün mütərəqqi standartlar əsasında monitorinq və qiymətləndirmə sisteminin yaradılması vacib məsələlərdən biridir. Bununla əlaqədar qabaqcıl dünya təcrübəsi əsasında, beynəlxalq ekspertlərlə birgə qeyd olunan standartların hazırlanmasına başlanıb. Eyni zamanda, cari ilin may-iyun aylarında Avropa İttifaqının "Azərbaycanda sosial xidmətlər sisteminin inkişafı" Tvinninq layihəsinin icrasına başlanacaq. Avstriyanın müvafiq qurumu ilə birgə icra olunacaq bu layihə ölkəmizdə sosial xidmətlərin təkmilləşdirilməsi üçün həmin ölkənin qabaqcıl təcrübəsindən istifadəyə şərait yaradacaq".
İclasda ƏƏSMN yanında Dövlət Sosial Təminat Xidmətinin rəisi Çingiz Əliyev ötən il nazirliyin sosial sifarişlər üzrə müsabiqələrində qalib gələn layihələrin icrasının nəticələri ilə bağlı məlumat verib. Sosial xidmətlər üzrə layihələri icra edən ayrı-ayrı QHT-lərin rəhbərləri sosial sifarişlər üzrə müsabiqələrin nəticələrinə dair xüsusi təqdimatlarla çıxış ediblər, ayrı-ayrı təkliflər səsləndiriblər. Vurğulanıb ki, ƏƏSMN-in mərkəzi icra hakimiyyəti orqanı olaraq bu sahədə QHT-lərlə fəal əməkdaşlığı dövlət qurumları ilə vətəndaş cəmiyyətləri arasında fəal əməkdaşlığın bariz nümunəsidir. İclasda bu istiqamətdə görülən işlərin daha geniş şəkildə ictimaiyyətə çatdırılması üçün xüsusi bir konfransın keçirilməsi qərara alınıb.