Bakı, 17 mart, AZƏRTAC
Gürcüstan Milli Parlament Kitabxanasının direktoru Georgi Kekelidze və Elektron resurslar üzrə direktor müavini Levan Taktakişvili mart ayının 17-də M.F.Axundzadə adına Azərbaycan Milli Kitabxanasında olublar.
Milli Kitabxanadan AZƏRTAC-a bildirilib ki, görüşdə Georgi Kekelidze son bir il ərzində Gürcüstan Milli Parlament Kitabxanasında baş verən yeniliklərdən danışıb.
G.Kekelidze bildirib ki, kitabxana “Sierra” avtomatlaşdırılmış kitabxana sistemi əsasında işləyir.
Görüşün məqsədi Azərbaycan Milli Kitabxanası və Gürcüstan Milli Parlament Kitabxanası arasında bağlanmış ikitərəfli qarşılıqlı əməkdaşlıq haqqında memorandumun şərtlərinə müvafiq olaraq elektron kitab mübadiləsinin həyata keçirilməsidir. Bu mübadilə hər iki ölkənin milli kitabxanalarının fondunun zənginləşməsinə səbəb olacaq, kitabların təkrar surətinin çəkilməsinin, vaxt və əmək itkisinin, əlavə maddi xərclərin qarşısını alacaq.
Söhbət əsnasında memoranduma əlavə olaraq bu proseslərin həyata keçirilməsi üçün qarşılıqlı razılaşma əsasında müqavilə hazırlanması və Tbilisidə imzalanması qərara alınıb.
Qonaqlar, həmçinin Milli Kitabxanada tətbiq olunan “VTLS-Virtua” proqramı ilə yaxından tanış olublar.