"Ermənilərin "soyqırıma" məruz qalmalarını elan etməsi onların hiyləsidir. Türkiyə bu hiylədən ehtiyatlı olmalıdır. Bu hiylənin üstü açılmalı və ifşa edilməlidir".

ANS TV-nin məlumatına görə, bunu Bakıda Türkiyə baş nazirinin baş müşaviri Hacı Bekir Karlığa ilə görüş zamanı Qafqaz Müsəlmanları İdarəsinin (QMİ) sədri Allahşükür Paşazadə deyib.

O bildirib ki, əsl soyqırımı ermənilər bizə qarşı törədiblər. Allahşükür Paşazadənin sözlərinə görə, Azərbaycan-Türkiyə qardaşlığına heç kim xələl gətirə bilməz. QMİ sədri qeyd edib ki, Türkiyə ən ağır anlarda, müstəqiliyin əldə edilməsində, o cümlədən Qarabağ məsələsində Azərbaycanın yanında olub:

"Biz bir millət, iki dövlət kimi bundan sonra da əməkdaşlığımızı sıx şəkildə davam etdirəcəyik", - deyə Allahşükür Paşazadə deyib.

Bekir Karlığa isə bildirib ki, İslam dini mədəniyyət, ağıl, həyat, gözəlliklər dinidir. Türkiyə Baş Nazirinin baş müşaviri bəzi ölkələrdə ortaya çıxan vəhşiliklərin İslamla heç bir əlaqəsi olmadığını deyib.
Mənbə
ANS PRESS