Bakı, 6 mart, AZƏRTAC
Dünya Güləş Birliyi 2015-ci il fevral ayında keçirilən yarışların nəticəsinə əsasən, yunan-Roma güləşi üzrə yeni reytinq siyahısını açıqlayıb.
AZƏRTAC xəbər verir ki, yunan-Roma güləşi üzrə reytinq siyahısına 10 idmançımızın adı daxil edilib.
Martda İranda keçirilən dünya kuboku yarışında yeni bir tarix yazan yunan-Roma güləşçilərimiz reytinq sıralamasında da nəzərəçarpacaq uğura imza atıblar. Rəsul Çunayev (71 kq) və Rafiq Hüseynov (80 kq) ötən ay keçirilən dünya kuboku yarışlarındakı nəticələrinə görə, fevral ayının reytinq sıralamasında birinci olublar. Məlumat üçün bildirək ki, Rafiq Hüseynov dünya kubokunda keçirdiyi 4 görüşdən hamısını qələbə ilə başa vurub. Finalda isə ötən ilin dünya çempionatının gümüş mükafatçısı Yevgeni Saleyevi üstələyib. Rəsul Çunayev isə kubok yarışlarında keçirdiyi 3 görüşü qələbə ilə başa vurub və finalda dünya çempionu Çingiz Labazanovu üstələyib.
Dünya çempionatının gümüş mükafatını qazanan Saman Təhmasibi (85 kq) və dünya çempionatının bürünc mükafatçısı Elvin Mürsəliyev (75 kq) mövqelərini qoruyub. Onlar müvafiq olaraq siyahıda 2-ci və 5-ci yerdədir. Dünya çempionatını 5-ci sırada tamamlayan Həsən Əliyev (66 kq) isə Dünya Kuboku yarışındakı göstəricilərinə görə 2 pillə irəliləyərək 5-ci sırada qərarlaşıb. Dünya Kuboku yarışındakı uğurlu çıxışı İslam Abbasovun (85 kq) 13-cü pillədən 8-ə yüksəlməsi ilə nəticələnib.
Digər güləşçilərimizdən Taleh Məmmədov (59 kq) və Kamran Məmmədov (66 kq) 13-cü, Sabah Şəriəti (130 kq) 17-ci, Orxan Nuriyev (98 kq) isə 18-ci pillədə qərarlaşıblar.