Bakı, 21 aprel, AZƏRTAC
«Современная АЗС» jurnalının mart ayında keçirdiyi MDB məkanında “Ayın ən yaxşı yanacaqdoldurma məntəqəsi” müsabiqəsində “Azpetrol” şirkətinin Heydər Əliyev prospekti 108 ünvanında yerləşən yanacaqdoldurma məntəqəsi (YDM) qalib olub.
Şirkətdən AZƏRTAC-a bildirilib ki, Moskvada “Müasir yanacaqdoldurma məntəqəsi və neftbaza” mövzusunda keçirilən 12-ci Beynəlxalq konfrans-sərgidə müsabiqənin qalibi diplomu şirkətə təqdim edilib.
1997-ci il iyulunda Bakıda ilk yanacaqdoldurma məntəqəsinin istismara verilməsi ilə Azərbaycanın iqtisadi məkanına daxil olan “Azpetrol Ltd.” MMC-nin əsas fəaliyyəti yanacağın pərakəndə və topdan satışını yanacaqdoldurma və qazdoldurma məntəqələri şəbəkəsi vasitəsilə həyata keçirməkdən ibarətdir. Hazırda şirkətin Azərbaycanın əksər iqtisadi zonalarını əhatə etməklə ən müasir avadanlıqlarla təchiz olunmuş 76 yanacaqdoldurma (YDM) və 5 qazdoldurma məntəqəsi (QDM) fəaliyyət göstərir.