Bakı, 21 aprel, AZƏRTAC 
Azərbaycanın Efiopiyadakı səfiri Elman Abdullayevin Efiopiya Patriarxı I Abune Matiyas ilə görüşündə ölkələrimiz arasında münasibətlərin inkişaf perspektivləri müzakirə edilib, əlaqələrin genişlənməsi üçün potensialın mövcud olduğu bildirilib.
Xarici İşlər Nazirliyinin mətbuat xidmətindən AZƏRTAC-a verilən məlumata görə, görüşdə I Abune Matiyasa Azərbaycanın müxtəlif sahələrdə əldə etdiyi uğurlar, regional liderə çevrilən ölkəmizin multikulturalizm və dinlərarası dialoqun təşviq edilməsi istiqamətində həyata keçirdiyi beynəlxalq miqyaslı fəaliyyət və ev sahibliyi etdiyi beynəlxalq tədbirlər barədə məlumat verilib.
Səfir Azərbaycanda tolerantlıq və çoxmədəniyyətlilik ənənələrinin tarixən inkişaf etdiyini diqqətə çatdıraraq, bu ənənələrin əsasının qədim zamanlardan qoyulduğunu bildirib. O, Azərbaycanın dünyada multikulturalizmin təşviqinə daim töhfə verdiyini və ölkəmizdə tarixən bütün dinlərin nümayəndələrinin dinc şəraitdə yaşadığını vurğulayıb.
Görüşdə Azərbaycanın müxtəlif mədəniyyətlər arasında daim körpü rolunu oynadığı qeyd edilib.
Birinci Abune Matiyas Azərbaycanın Efiopiyada yeni açılmış səfirliyinin fəaliyyəti ilə maraqlanıb və iki ölkə arasında münasibətlərin inkişaf etdirilməsi yolunda səfirliyə fəaliyyətində uğurlar arzulayıb. Patriarx Azərbaycanla Efiopiya arasında münasibətlərin inkişaf etdirilməsi üçün qarşılıqlı şəkildə səylərin davam etdirilməsinin vacibliyini vurğulayıb.
E.Abdullayev Azərbaycanın Afrika ölkələri ilə əməkdaşlığa böyük əhəmiyyət verdiyini və Əddis-Əbəbədə fəaliyyət göstərən səfirliyin həm Efiopiya, həm də Afrika İttifaqı ilə ikitərəfli münasibətləri inkişaf etdirməyə çalışacağını bildirilib.
Diplomat Azərbaycan səfirliyi adından Pasxa bayramı münasibətilə Patriarxı və onun rəhbərlik etdiyi qurumu təbrik edib.