Moskva, 20 aprel, AZƏRTAC
Moskvada MDB-nin iştirakçısı olan ölkələrin Miqrasiya Orqanları Rəhbərləri Şurasının 17-ci iclası keçirilib.
Azərbaycanı tədbirdə Dövlət Miqrasiya Xidməti rəisinin müavini Pərviz Musayev təmsil edib.
İclasda qaçqınların və məcburi köçkünlərin problemlərinin həllində Azərbaycanın, sığınacaq verilməsi sahəsində Rusiyanın təcrübəsi və s. məsələlər nəzərdən keçirilib. MDB ölkələrinin miqrasiya idarələrinin təmsilçiləri Birliyin iştirakçısı olan ölkələrin vətəndaşlarının qüvvədən düşmüş sənədləri üzrə vahid məlumat bazasının yaradılması məsələsini, işləyən miqrantın elektron kartının tətbiqi üzrə əməkdaşlıq haqqında sazişin layihəsini, MDB ölkələri ərazilərində vahid qeydiyyat sisteminin yaradılması və digər məsələləri müzakirə ediblər.
Rusiya Federal Miqrasiya Xidmətinin başçısı Konstantin Romodanovski iclasda bildirib ki, miqrantların sənədləri rəsmiləşdirmələri üçün Rusiyanın daha dörd regionunda, o cümlədən Voloqda, Uzaq Şərq, Krasnoyarsk və Krasnodarda vahid miqrasiya mərkəzləri açmaq planlaşdırılır.
Fəridə Abdullayeva
AZƏRTAC-ın xüsusi müxbiri
Moskva