Bakı, 17 aprel, Zərəngiz Mansurova, AZƏRTAC
Azərbaycan Yazıçılar Birliyinin (AYB) “Natəvan” klubunda orta əsr Şərq ədəbiyyatının görkəmli nümayəndəsi Ömər Xəyyamın Türkiyədə çap olunan “Rübailər” kitabının təqdimatı keçirilib.
AZƏRTAC xəbər verir ki, kitabın “Ön söz”ü, farsca mətnin transliterasiyası, filoloji tərcümə və elmi redaktəsi filologiya elmləri doktoru Nəsib Göyüşova məsusdur. Kitabda Hüseyn Cavid, Mikayıl Müşfiq, Əkrəm Cəfər, Mir Mehdi Seyidzadə və başqalarının poetik tərcümələri yer alıb. Poetik tərcümələrin tərtibçisi Enar Hacıyev, nəşriyyat redaktoru Könül Mirzəyevadır.
Tədbirdə Azərbaycan Milli Elmlər Akademiyasının müxbir üzvü Nizami Cəfərov Ömər Xəyyam “Rübailər” kitabının qardaş ölkədə nəşrini yüksək dəyərləndirərək, müəlliflərə təşəkkürünü bildirib.
Azərbaycan Yazıçılar Birliyinin katibi, xalq yazıçısı Çingiz Abdullayev, xalq şairi Zəlimxan Yaqub və digər çıxış edənlər Ömər Xəyyam kimi şairlərin əbədi olaraq ədəbiyyatda, sivilizasiyada qalacağını, zaman-zaman ona müraciət olunacağını bildiriblər.
Kitabda məşhur İran rəssamı Məhəmməd Təcvidinin Ömər Xəyyamın rübailərinə çəkdiyi miniatürlər, rəsmlər də yer alıb.
Sonda kitabın tərtibçisi, filologiya elmləri doktoru Nəsib Göyüşov çıxış edərək nəşrin araya-ərsəyə gəlməsində və təqdimatının keçirilməsində əməyi olan hər kəsə təşəkkürünü bildirib.