Bakı, 16 aprel, AZƏRTAC
Azərbaycanın energetika naziri Natiq Əliyevin İtaliya Respublikasının iqtisadi inkişaf naziri Federika Quidinin başçılıq etdiyi nümayəndə heyəti ilə aprelin 16-da keçirdiyi görüşdə iki ölkə arasında əlaqələrin uğurla inkişaf etdiyi və hər iki ölkənin əməkdaşlığının genişləndirilməsinə böyük önəm verdiyi diqqətə çatdırılıb, əlaqələrin hörmət və dostluq, qarşılıqlı maraq prinsiplərinə əsaslandığı vurğulanıb.
Energetika Nazirliyindən AZƏRTAC-a verilən məlumata görə, görüşdə Azərbaycan ilə İtaliya arasında iqtisadi sahədə əlaqələrin daha da genişləndirilməsi üçün hər iki ölkənin böyük potensiala malik olduğu diqqətə çatdırılıb. Qeyd edilib ki, biznes forumlar, işgüzar görüşlər və sahibkarların iştirakı ilə keçirilən digər tədbirlər iqtisadi əlaqələrin inkişafında əhəmiyyətli rol oynayır.
Azərbaycan iqtisadiyyatı barədə də məlumat verən N.Əliyev ölkəmizin dayanıqlı iqtisadi inkişafa malik, Avropanın enerji təhlükəsizliyinin təmin olunmasında etibarlı tərəfdaş, iri regional enerji və nəqliyyat layihələrinin iştirakçısı olduğunu vurğulayıb. İtaliyanın iqtisadi inkişaf naziri F.Quidi Azərbaycana səfərindən məmnunluğunu ifadə edib, İtaliya və Azərbaycan arasında iqtisadi əlaqələrin daha da genişləndirilməsi üçün mövcud potensialdan səmərəli istifadənin, iş adamları arasında əlaqələrin genişləndirilməsinin, İtaliya-Azərbaycan iqtisadi-ticarət əməkdaşlığının inkişafında əhəmiyyətini, iqtisadi əlaqələrin inkişaf istiqamətlərini diqqətə çatdırıb.
Görüşdə dostluq zəminində qurulan Azərbaycan-İtaliya əməkdaşlığının uğurla inkişaf etdiyi vurğulanıb, qarşılıqlı faydalı əməkdaşlığın genişlənəcəyinə əminlik ifadə edilib.