Bakı, 16 aprel, AZƏRTAC
Hindistan nüvə başlığı daşıya bilən Agni-III ballistik raketini uğurla sınaqdan keçirib.
AZƏRTAC RİA Novosti informasiya agentliyinə istinadla xəbər verir ki, atəş uzaqlığı 3 min kilometr olan Agni-III Odişa ştatının sahilləri yaxınlığındakı Uiler adasında yerləşən raket qurğusundan buraxılıb.
Uzunluğu 16 metr və çəkisi 48 ton olan raket 1,5 ton ağırlığında döyüş başlığı daşımağa qadirdir. Agni-III bərk yanacaqla işləyən iki pilləli mühərriklə təchiz edilib. O, həmçinin Hindistanın istənilən nöqtəsində dəmiryollarında hərəkət edə bilən mobil qurğudan da buraxıla bilər.
Qeyd edək ki, bir qədər əvvəl Pakistan da “Hauri” adlı nüvə başlığı daşıya bilən ballistik raketin təlim-döyüş sınağını həyata keçirmişdi.