Bakı, 15 aprel, AZƏRTAC
Kubanın Azərbaycandakı səfiri Omar Medina Quintero aprelin 15-də Azərbaycan Texniki Universitetində (AzTU) olub.
Görüşdə diplomat Kubanın Olqin Universiteti ilə Azərbaycan Texniki Universiteti arasında əməkdaşlığın qurulması arzusunu bildirilib, bu əlaqələrin hər iki tərəf üçün faydalı olacağını nəzərə çatdırıb. Səfirin təklifi AzTU-nun rektoru tərəfindən məmnunluqla qarşılanıb və hər iki ali məktəb arasında müqavilə imzalanması barədə razılıq əldə edilib.
Universitetin mətbuat xidmətindən AZƏRTAC-a bildiriblər ki, AzTU-nun rektoru, professor Havar Məmmədov qonağa iqtisadiyyatın bir çox sahələri üçün yüksəkixtisaslı mühəndis kadrları hazırlayan Texniki Universitet, onun beynəlxalq əlaqələri barədə məlumat verib, burada tədrisin ölkəmizdə həyata keçirilməkdə olan təhsil strategiyasının tələblərinə uyğun təkmilləşdirilməsi sahəsində görülən işlərdən danışıb.
Səfir Azərbaycan Texniki Universitetinin Kubada yaxşı tanındığını, indiyədək ölkəsi üçün bu ali məktəbdə 200-dən çox mühəndis hazırlandığını və onların iqtisadiyyatın müxtəlif sahələrində uğurla çalışdıqlarını, AzTU ilə bundan sonra da faydalı əməkdaşlığı davam etdirməyin vacibliyini vurğulayıb.