Bakı, 15 aprel, AZƏRTAC 
“Korrupsiyaya qarşı mübarizəyə dair 2012-2015-ci illər üçün Milli Fəaliyyət Planı”na uyğun olaraq, İqtisadiyyat və Sənaye Nazirliyi tərəfindən korporativ idarəetmə prinsiplərinin dövlət müəssisələrində tətbiqi ilə bağlı “İdarə heyətinin formalaşdırılması” mövzusunda növbəti təlim keçirilib.
İqtisadiyyat və Sənaye Nazirliyindən AZƏRTAC-a bildiriblər ki, 20-dən çox dövlət müəssisəsinin nümayəndəsinin iştirak etdiyi tədbirdə nazirliyin korporativ idarəetmə sektorunun müdiri Anar Hacızadə şirkətin icra orqanının rolu, habelə icra orqanı üzvlərinin hüquq və vəzifələri barədə iştirakçılara məlumat verib.
Təlim çərçivəsində icra orqanı institutu ilə bağlı mövcud beynəlxalq təcrübədən danışılıb, mövzu ətrafında müzakirələr aparılıb.
Məlumatda qeyd olunur ki, İqtisadiyyat və Sənaye Nazirliyi tərəfindən korporativ idarəetmə prinsiplərinin dövlət müəssisələrində tətbiqi ilə bağlı 38 istiqaməti əhatə edən 8 mövzu üzrə təlimlərin keçirilməsi nəzərdə tutulur.