Bakı, 15 aprel, AZƏRTAC 
“RUH” Jurnalistləri Müdafiə Komitəsi “Tələbə gənclər arasında demokratik proseslərin dərinləşməsinə dəstək məqsədi ilə jurnalistikanın təbliği” layihəsinin icrasına başlayıb.
Komitədən AZƏRTAC-a bildiriblər ki, layihə Azərbaycan Respublikasının Prezidenti yanında Qeyri-Hökümət Təşkilatlarına Dövlət Dəstəyi Şurasının maliyyə yardımı ilə həyata keçiriləcək və 2015-ci ilin aprel-iyul aylarını əhatə edəcək.
Digər ixtisas sahiblərinin də jurnalistikaya marağının artması, hazırda kütləvi informasiya vasitələrində qeyri-ixtisas sahiblərinin də çalışması nəzərə alınmaqla 2014-cü ildən ali məktəblərin hümanitar sahəyə aid olmayan bakalavrlarının da magistr pilləsində jurnalistika ixtisasının seçmələrinə şərait yaradılıb. Belə bir mexanizmin tətbiqi bacarıqlı şəxslərin jurnalistika peşəsinə yiyələnməsinə dəstək məqsədi daşıyır.
Layihədə ali məktəblərin bakalavr pilləsində təhsil alan tələbələrin jurnalistika ixtisasına marağını artırmaq, onların jurnalistika fakültələrinin magistr pilləsində təhsillərini davam etdirmələrini stimullaşdırmaq başlıca hədəf kimi seçilib. Bunun üçün Bakı ilə yanaşı, Gəncə, Mingəçevir, Quba və digər bölgələrdə görüşlərin təşkili planlaşdırılıb. Eyni zamanda, ali məktəb tələbələri arasında müvafiq sorğunun keçirilməsi də layihənin fəaliyyət planında yer alıb.