Bakı, 13 aprel, AZƏRTAC
Aprelin 14-də Bakı Şəhər Mədəniyyət və Turizm İdarəsinin daxili imkanları hesabına əsaslı təmir edilmiş Suraxanı rayonu, Zığ qəsəbə Mədəniyyət evinin və Suraxanı rayon Mərkəzləşdirilmiş Kitabxana Sisteminin 3 saylı filialının açılışı olacaq.
İdarənin mətbuat xidmətindən AZƏRTAC-a bildirilib ki, təmirdən çıxmış müəssisə mədəniyyət işçilərinin iş şəraitinin yaxşılaşdırılması, əhalinin asudə vaxtının səmərəli təşkili, qəsəbə sakinlərinə mədəni xidmət səviyyəsinin yüksəldilməsi məqsədilə yenidən istifadəyə veriləcək. Görülmüş işlər nəticəsində mədəniyyət evinin daha yaxşı fəaliyyət göstərməsi üçün əlverişli şərait yaradılıb, oxuculara daha yüksək səviyyədə xidmət göstərilməsi üçün kitabxananın ərazisi genişləndirilib.
Qeyd edək ki, Zığ qəsəbə Mədəniyyət evinin əsası 1960-cı ildə qoyulub, ümumi sahəsi 450 kvadratmetr olan binanın bir hissəsində mədəniyyət evi, digər hissəsində isə Suraxanı rayon Mərkəzləşdirilmiş Kitabxana Sisteminin 3 saylı filialı yerləşir.