Bakı, 11 aprel, AZƏRTAC
Azərbaycan Milli Elmlər Akademiyasının Şəki Regional Elmi Mərkəzində (ŞREM) son beş ildə uğurlu elmi nəticələr əldə olunub.
AZƏRTAC xəbər verir ki, ŞREM-də ipək çıxımı 8-10 faiz artıq olan, xəstəliyə dözümlü tut ipəkqurdu xətləri yaradılıb. Biostimulyatorların tut ipəkqurdunun məhsuldarlığına təsiri öyrənilib. Gön-dəri, yun məhsullarının yeni alınmış təbii boyaq maddəsi ilə rəngləmə üsulu təklif edilib. Sel, onu yaradan amillər, formalaşmasının qarşısının alınması məqsədilə təkliflər hazırlanıb. Yeni alma və armud sortları yaradılıb. Polimetal filiz yataqlarının axtarışında indikatorların rolu öyrənilib.
Mərkəz tərəfindən bölgə folklorunun toplanması, tədqiqi aparılıb, folklor muzeyi yaradılıb. Şəki, Qax, Zaqatala, Balakən, Oğuz rayonları üzrə coğrafi problemlər və xeyir-dualar kitabları nəşr edilib.