Bakı, 10 aprel, AZƏRTAC
Aprelin 12-də Q. Abbasov adına mədəniyyət sarayında Bakı Uşaq Teatrının “Xaş-xaşın göz yaşı” tamaşası nümayiş olunacaq.
Teatrın mətbuat xidmətindən AZƏRTAC-a bildirilib ki, tamaşa Beynəlxalq Qızıl Xaç Komitəsinin Azərbaycandakı nümayəndəliyinin sifarişi ilə hazırlanıb.
Bu AİDS mövzusunda Azərbaycanda hazırlanmış ilk maarifləndirici teatr tamaşasıdır. Tamaşa gənclərdə narkomaniyanın doğurduğu faciələr, AIDS və bir sıra başqa qorxunc xəstəliklərin yayılması yolları haqqında aydın təsəvvür yaradır.
Səhnə əsəirində qoyulan problemlər bir qrup tələbə gəncin timsalında tamaşaçıya çatdırılır. Qarşılaşdıqları irili-xırdalı çətinliklərə tab gətirməyən gənclər asanlıqla “dərdləri unutduran” vasitəyə qurşanırlar. Valideynlərin yanlış münasibəti isə buna təkan verir.