Bakı, 10 aprel, AZƏRTAC
Səudiyyə Ərəbistanının başçılığı ilə Yəməndə husi-şiə üsyançılarına qarşı mübarizə aparan ərəb ölkələri koalisiyası İran hərbi gəmilərinin Ədən körfəzinə yaxınlaşmasında təhlükə görür.
AZƏRTAC TASS informasiya agentliyinə istinadla xəbər verir ki, bu barədə “ərəb koalisiyası”nın rəsmi nümayəndəsi general Əhməd Əsiri bildirib.
“Bu gəmilərin beynəlxalq sularda olduğunu və İranın onları bura göndərməyə haqqı çatdığını bilirik. Lakin Yəmən ərazisi və onun daxili suları koalisiyanın daimi nəzarəti altındadır. Əgər bu gəmilər üsyançılara silah və ya hər hansı bir komək göndərməyə cəhd etsələr, bizim onlara adekvat cavab verməyə haqqımız çatacaq”, - deyə general qeyd edib.
Əsirinin sözlərinə görə, koalisiya qoşunları vahid cəbhədə koordinasiya ilə hərəkət edir və əməliyyat yekun nəticə əldə etmək istiqamətində aparılır. Aviasiya üsyançılar tərəfindən istifadə edilən rabitə infrastrukturlarına zərbələr endirir. Bundan başqa koalisiya yerli əhalidən təşkil olunmuş könüllülərdən ibarət xalq müqavimət komitəsini də dəstəkləyir.
Qeyd edək ki, martın 26-na keçən gecədən Bəhreyn, Qətər, Küveyt və Birləşmiş Ərəb Əmirliklərinin dəstəyi ilə Səudiyyə Ərəbistanının Hərbi Hava Qüvvələri Yəmən ərazisində şiə üsyançılarının mövqelərinə hava zərbələri endirməyə başlayıb. Yəməndə qanuni prezident Abd Rabbo Mənsur Hadi və onun hökumətinin bərpa olunmasına yönələn “Qətiyyət tufanı” kod adı altında aparılan əməliyyatlara sonradan Misir, İordaniya, Mərakeş, Pakistan və Sudan da qoşulub.