Bakı, 10 aprel, AZƏRTAC
Azərbaycan Respublikası Baş Prokurorluğunun və Hərbi Prokurorluğunun təşkilati üzvü və çoxsaylı prokurorluq əməkdaşlarının fərdi üzvü olduğu, dünya prokurorlarını bir qurumda birləşdirən ilk və yeganə təşkilat olan Beynəlxalq Prokurorlar Assosiasiyası (BPA) ilə əməkdaşlıq uğurla davam etdirilir.
Baş Prokurorluğun mətbuat xidmətindən AZƏRTAC-a bildiriblər ki, həmin qurumla əməkdaşlıq çərçivəsində aprelin 8-dən 9-dək Bəhreyn Krallığının Manama şəhərində Assosiasiyanın növbəti İllik Yaz İclasının sessiyası keçirilib.
Tədbirdə Bəhreyn Krallığının baş prokuroru doktor Əli Əlbinyanın dəvəti ilə Assosiasiyanın İcraiyyə Komitəsinin üzvü, Azərbaycan Respublikası baş prokurorunun müavini - Baş Prokuror yanında Korrupsiyaya Qarşı Mübarizə Baş İdarəsinin rəisi Kamran Əliyev iştirak edib.
Sessiyada təşkilatın rəhbər orqanların, o cümlədən Assosiasiyanın prezidentinin, baş katibinin və baş müşavirinin, eləcə də İcraiyyə Komitəsi üzvlərinin hesabatları dinlənilib, növbəti il üçün qarşıda duran məsələlər müzakirə olunub.
Azərbaycan Respublikası baş prokurorunun müavini - Baş Prokuror yanında Korrupsiyaya Qarşı Mübarizə Baş İdarəsinin rəisi K.Əliyev 2014-cü il aprelin 8-də BPA-nın prezidenti, Avstriya baş prokurorunun müavini Gerhard Yaroşun ölkəmizə səfəri çərçivəsində Azərbaycan Respublikasının baş prokuroru Zakir Qaralovla görüşünü xatırladıb. O, həmin görüşdə aparılan müzakirələr zamanı Assosiasiyanın veb-saytının Antikorrupsiya alt domeninin yaradılması və bu işin həyata keçirilməsinin Baş Prokuror yanında Korrupsiyaya Qarşı Mübarizə Baş İdarəsinə həvalə edilməsi barədə əldə olunmuş razılaşmanı diqqətə çatdıraraq bu istiqamətdə görülmüş işlərlə əlaqədar təqdimatla çıxış edib. K.Əliyev bu məsul işin Böyük Britaniya Krallığı Prokurorluğu Xidməti və Braziliya Baş Prokurorluğu ilə birgə ölkəmizə həvalə edilməsini beynəlxalq aləm tərəfindən Azərbaycanda korrupsiyaya qarşı aparılan mübarizəyə göstərilən etimadın təcəssümü kimi qiymətləndirdiyini xüsusi vurğulayıb.
Tədbirdə təşkilati və digər məsələlər müzakirə edilib, Assosiasiyanın korrupsiyaya qarşı mübarizə və çirkli pulların yuyulmasına həsr olunmuş növbəti - 20-ci illik konfransının və iclasının bu il sentyabrın 13-17-də İsveçrənin Sürix şəhərində keçirilməsi qərara alınıb.