Stokholm, 9 aprel, AZƏRTAC
İsveçin BYGGnyheter jurnalının saytında Azərbaycanda tikintisi gerçəkləşən “Xəzər Adaları” layihəsi ilə bağlı məqalə yerləşdirilib.
Yazıda oxucuların diqqətinə çatdırılır ki, dünyada nəhəngliyi ilə fərqlənən bu layihə Azərbaycanın paytaxtı Bakı şəhərindən 23 kilometr cənubda 41 süni adanın tikintisini nəzərdə tutur. 2011-ci ilin martından həyata keçirilməsinə başlanılan “Xəzər Adaları”nın mərhələlərlə tikilərək 2020-2025 illərdə tam bitirilməsi gözlənilir.
Məqalədə qeyd olunur ki, “Xəzər Adalarında” beynəlxalq hava limanı və 150 körpünün, həmçinin 150 məktəb, 50 xəstəxana, bir neçə park, ticarət və mədəniyyət mərkəzlərinin, institut kampusları və Formula-1 trasının tikilməsi planlaşdırılıb. Burada, həmçinin dünyanın ən hündür binasının - "Azerbaijan Tower” qülləsinin tikintisi də nəzərdə tutulur.
Sonda vurğulanır ki, böyük infrastruktura layihəsi olan “Xəzər Adaları”nda 600 min nəfərin yaşaması üçün 2442 hektar ərazidə 153 min yeni mənzil tikiləcək. Layihənin tam dəyərinin 100 milyard dollar təşkil edəcəyi gözlənilir.
Rauf Əliyev
AZƏRTAC-ın xüsusi müxbiri
Stokholm