Türkmənistan öz qazını Avropaya ixrac etmək üçün Azərbaycan və Türkiyə ilə danışıqlar aparır.

ANS PRESS-in məlumatına görə, bunu Türkmənistan prezidenti Qurbanqulu Berdiməhəmmədov Aşqabadda rəsmi səfərdə olan Moldova prezidenti Nikolay Timofti ilə görüşdən sonra deyib.

O bildirib ki, Türkmənistan Rusiyaya, İrana və Çinə qaz satır, həmçinin öz qaz ixracının diversifikasiyası üzərində işləyir: "İndi biz Azərbaycan və Türkiyə ilə üçtərəfli danışıqları aparırıq. Ümid edirəm, razılığa gələcəyik və bu, Avropa vektorunun reallaşdırması yolunda daha bir addım olacaq.

Onun sözlərinə görə, Türkmənistan Xəzər regionunda və Mərkəzi Asiyada qaz bazarında əsas oyunçulardan biridir. Söhbət Avropa istiqaməti haqqında gedirsə, onda Xəzər vasitəsilə Azərbaycan sahilinə 300 kilometrlik qaz kəmərinin çəkilməsi ən optimal marşrut olardı. Türkmənistan qazın Türkiyəyə və Avropaya ixracı üçün uyğun infrastruktura malikdir.
Mənbə
ANS PRESS