Bakı, 3 aprel, AZƏRTAC
Aprelin 3-də Azərbaycan Milli Elmlər Akademiyasının (AMEA) rəyasət heyətində AMEA-nın Aqrar Elmlər Bölməsinin (AEB) növbəti iclası keçirilib.
AMEA-dan AZƏRTAC-a bildiriblər ki, bölmənin büro üzvlərinin iştirak etdikləri iclası AEB-in akademik-katibi, akademik Qərib Məmmədov açaraq gündəlikdəki məsələlər barədə məlumat verib.
Tədbirdə ingilis dilində nəşr olunacaq “Azərbaycanda aqrar sektorun uğurlu inkişafının əsasları” və “Azərbaycanda müasir ekoetika” kitablarının müzakirəsi aparılıb.
Sonra AMEA rəyasət heyətinin innovasiya şöbəsinin müdiri, aqrar elmləri üzrə fəlsəfə doktoru Vüqar Babayev Kənd Təsərrüfatı Nazirliyi tərəfindən Qəbələ rayonunda keçirilməsi planlaşdırılan “Tarla günləri” açıq hava sərgisi barədə ətraflı məlumat verib. Bildirilib ki, Prezident İlham Əliyevin “2015-ci ilin Azərbaycan Respublikasında “Kənd təsərrüfatı ili” elan edilməsi haqqında” 2015-ci il 12 yanvar tarixli Sərəncamına əsasən Kənd Təsərrüfatı Nazirliyi aprelin 4-dən oktyabrın 10-dək Qəbələ rayonunun Göyçaykənd ərazisində “Tarla günləri” açıq hava sərgisi keçirəcək. Qeyd edilib ki, on hektar ərazidə təşkil ediləcək müsabiqə xarakterli “Tarla günləri”ndə kənd təsərrüfatı bitkilərinin əkini, yeni texnologiyaların tətbiqi nümayiş olunacaq. V.Babayev əkin sxemini hazırladığını və tezliklə təqdim edəcəyini də söyləyib.
İclasda, həmçinin 2014-cü ildə bölmə institutlarında elmlər doktoru və fəlsəfə doktoru hazırlığı üzrə dissertanturaya qəbul olunan namizədlərin mövzuları da təsdiqlənib.