Bakı, 3 aprel, AZƏRTAC
Prezident İlham Əliyevin təşəbbüsü ilə həyata keçirilən və ölkəmizin müsbət beynəlxalq imicinin formalaşmasında böyük əhəmiyyətə malik olan Bakı prosesi, Ümumdünya Mədəniyyətlərarası Dialoq Forumunun elmi tədqiqat və təşviqi, habelə respublikamızın elmi ictimaiyyətinin sözügedən sahəyə diqqətinin artırılması, mədəniyyətlərarası dialoq və multikulturalizm kimi sosial-siyasi məfhumların respublikamızda aparılan elmi araşdırmaların əsas tədqiqat predmetlərindən birinə çevrilməsi və bu sahənin inkişafına xidmət edə biləcək ekspert rəylərinin toplanması məqsədilə Mədəniyyət və Turizm Nazirliyi “Mədəniyyətlərarası dialoq: siyasi dəyər və sülhün təminatçısı” mövzusunda məqalə-ideya müsabiqəsini keçirir.
AZƏRTAC xəbər verir ki, təqdim edilən məqalələr ölkəmizin bir sıra elm və ali təhsil müəssisələri rəhbərlərinin üzv olduğu komissiya tərəfindən qiymətləndiriləcək. Komissiyaya mədəniyyət və turizm naziri Əbülfəs Qarayev rəhbərlik edir.
Qaliblər mükafatlandırılacaqlar.
Ətraflı məlumatı (012) 493-42-94 nömrəli telefon və musabiqe.forum2015@gmail.com elektron ünvanı vasitəsilə əldə etmək olar.
Müsabiqə üçün məqalələr aprelin 20-dək qəbul olunur.