Bakı, 3 aprel, AZƏRTAC
BMT-nin Baş katibi Pan Gi Mun İranın nüvə proqramı üzrə danışıqların iştirakçılarını növbəti mərhələnin uğurla başa çatması münasibətilə təbrik edib. Onun sözlərinə görə, bu mərhələ “tarixi” birgə fəaliyyət planının işlənib hazırlanmasına yol açır.
AZƏRTAC bu xəbəri BMT Xəbərlər Mərkəzinə istinadla verir.
Qeyd edək ki, bu yaxınlarda Lozannada ABŞ-ın, Böyük Britaniyanın, Fransanın, Almaniyanın, Rusiyanın, Çinin xarici işlər nazirləri və İranın xarici siyasət idarəsinin başçısı gələcək saziş üzrə ilkin siyasi çərçivə razılaşması əldə ediblər. Ölkələr sənədi iyunun 30-dək qəbul etməyə ümid bəsləyirlər. Müqavilə nüvə silahı istehsalında İranın imkanlarının ciddi məhdudlaşdırılması əvəzində İslam Respublikasından beynəlxalq sanksiyaların götürülməsini nəzərdə tutur.
BMT baş katibinin bəyanatında deyilir: “Sənəd İranın ehtiyaclarına və onun hüquqlarına hörməti təmin edəcək, eyni zamanda, nüvə fəaliyyətinin son dərəcə sülh xarakteri daşıyacağı barədə beynəlxalq ictimaiyyətə təminat verəcək”.
Pan Gi Mun vurğulayıb ki, bu məsələyə dair əhatəli saziş regionda sülh işinə və sabitliyə kömək edəcək, habelə ölkələrin təhlükəsizlik sahəsində ən vacib problemlərin həlli istiqamətində əməkdaşlıq qurmasına imkan verəcək.