Ağsu, 3 aprel, AZƏRTAC
Ağsu rayonunun bütün yaşayış məntəqələrinin “mavi yanacaq”la təminatı istiqamətində tədbirlər davam etdirilir. Aprelin 3-də rayonun daha bir yaşayış məntəqəsinə - 662 nəfər əhalisi olan Maşadqanlı kəndinə təbii qaz verilib. Beləliklə, Ağsuda “mavi yanacaq”la təmin edilən yaşayış məntəqələrinin sayı 38-ə çatıb.
Kəndin qazlaşdırılmasında 2460 metrlik politelin borudan, 13153 metr müxtəlif diametrli kəndarası metal borudan istifadə edilib, 102 abonentin hamısı sayğaclaşdırılıb.
AZƏRTAC xəbər verir ki, bu münasibətlə keçirilən mərasimdə çıxış edənlər son illər ölkəmizdə, o cümlədən Ağsuda həyata keçirilən sosial layihələrdən, insanların həyat səviyyəsinin yüksəldilməsi istiqamətində görülən işlərdən danışıblar. Məlumat verilib ki, hazırda rayonun Qarabağlı, Gəgəli, Kəndoba kəndlərinə də təbii qaz xətti çəkilir. Habelə qeyd olunub ki, uzun illər istifadəsiz qalan və yararsız vəziyyətə düşən Hacıqabul MQKS-nin Kəndoba qazpaylayıcı stansiyasının əsaslı təmiri tam başa çatdırılıb, bununla da rayonun 9 kəndinə təbii qazın verilməsi ilə əlaqədar problem həll olunub.
Ağsaqqal Əlqara Fətəliyev, ziyalı Taleh Şükürov onlara bəxş edilən bu sevincə, göstərilən diqqət və qayğıya görə Prezident İlham Əliyevə minnətdarlıqlarını bildiriblər.