Zərdab, 2 aprel, AZƏRTAC
Yeni Azərbaycan Partiyası Zərdab rayon təşkilatı Gənclər Birliyinin IV konfransı keçirilib.
AZƏRTAC xəbər verir ki, konfrans iştirakçıları əvvəlcə şəhərin mərkəzində ulu öndər Heydər Əliyevin abidəsini ziyarət ediblər.
Heydər Əliyev Mərkəzində davam etdirilən konfransda dövlət himni səsləndirilib. Yeni Azərbaycan Partiyasının qurucusu, müstəqil Azərbaycan dövlətinin banisi, ümummilli lider Heydər Əliyevin xatirəsi bir dəqiqəlik sükutla yad olunub.
Konfransı Yeni Azərbaycan Partiyası Zərdab rayon təşkilatının sədri Pərvin Mahmudova açıb.
Sonra YAP rayon təşkilatı Gənclər Birliyinin sədri Ramin Əliyev hesabat məruzəsi ilə çıxış edib. Ötən müddətdə görülən işlər barədə məlumat verən R.Əliyev bildirib ki, hazırda birliyin üzvlərinin sayı 1747 nəfərdir. Onlardan 538 nəfəri ali, 275 nəfəri orta ixtisas təhsillidir. Üzvlərin 701 nəfəri qadınlardır: “Üzvlərimizin böyük əksəriyyətini gənclərin təşkil etməsi, əldə olunan nailiyyətlər Yeni Azərbaycan Partiyasına cəmiyyətdə artan inamın təzahürüdür. Ulu öndər Heydər Əliyevin siyasi kursunun layiqli davamçısı, Prezident İlham Əliyevin gənclərə göstərdiyi diqqət və qayğı bu gün hər birimizdən Azərbaycanın xoşbəxt gələcəyi üçün var qüvvə ilə çalışmağı tələb edir”.
Daha sonra təşkilati məsələlərə baxılıb. YAP Yardımlı rayon təşkilatı Gənclər Birliyinin şura və idarə heyətinin üzvləri, sədri, həmçinin YAP Gənclər Birliyinin respublika konfransına nümayəndələr seçilib.
Konfransda “Yeni Azərbaycan” qəzetinin baş redaktoru Hikmət Babaoğlu, YAP Siyasi Şurasının üzvü, Gənclər Birliyinin sədri Seymur Orucov, YAP İcra Katibliyinin məsul işçisi Həsən Daşdəmirov, YAP Zərdab rayon təşkilatının idarə heyətinin üzvü, Zərdab Rayon İcra Hakimiyyətinin başçısı Lütvəli Babayev çıxış ediblər.
İştirakçılar adından Yeni Azərbaycan Partiyasının Sədri, Prezident İlham Əliyevə müraciət qəbul olunub.
Sonda partiya sıralarına qəbul olunan bir qrup gəncə Yeni Azərbaycan Partiyasının üzvlük vəsiqəsi təqdim edilib.