Bakı, 1 aprel, Z. Mansurova, AZƏRTAC
Aprelin 1-də Niyazinin mənzil- muzeyində Azərbaycan professional musiqisinin və milli bəstəkarlıq məktəbinin banisi, dahi bəstəkarımız Üzeyir Hacıbəylinin anadan olmasının 130 illiyinə həsr edilmiş konsert təqdim olunub.
AZƏRTAC xəbər verir ki, Azərbaycan Musiqi Mədəniyyəti Dövlət Muzeyinin, Üzeyir Hacıbəyli adına Bakı Musiqi Akademiyasının (BMA), klassik musiqi həvəskarları klubunun və mənzil- muzeyin birgə təşkilatçılığı ilə keçirilən tədbirdə akademiyanın və Bülbül adına Orta İxtisas musiqi məktəbinin tələbələri iştirak ediblər.
Mənzil-muzeyin direktoru Rza Bayramov, BMA-nın professorları Oqtay Abbasquluyev, əməkdar incəsənət xadimi Ülviyyə Hacıbəyova və başqaları dahi bəstəkarın musiqimizin təbliği istiqamətindəki xidmətlərdən, gənc nəslə Azərbaycan və Qərb musiqisinin mənimsədilməsi yolunda fədakar əməyindən söhbət açıblar.
Konsertdə BMA-nın professorları-Nərminə Quiyeva, Gülnarə Əhmədzadə, Firəngiz Hacıyevanın tələbələri, beynəlxalq müsabiqə laureatları-Lalə Məhərrəmova, Aysel Şahbazlı, Nərmin Qasımlı, Bülbül adına Orta Ixtisas musiqi məktəbinin XI sinif şagirdi, beynəlxalq müsabiqələr laureatı Vurğun Vəkilov və başqaları Ü.Hacıbəylinin və tanınmış dünya bəstəkarlarının əsərlərini ifa ediblər.
Konsert maraqla qarşılanıb.