Masallı, 29 mart, Bağır Əliyev, AZƏRTAC
47-ci Beynəlxalq Kimya Olimpiadası bu il Bakıda keçiriləcək. Beynəlxalq bilik yarışmasına qatılmaq üçün ölkəmizin 215 məktəblisi bilik və bacarığını sınayıb.
AZƏRTAC xəbər verir ki, azərbaycanlı şagirdlərdən yalnız 13 nəfəri, o cümlədən Masallı rayonunun Xocavar tam orta məktəbinin XI sinif şagirdi Röyal Həmidov Olimpiadanın yekun mərhələsində iştirak etməyə vəsiqə qazanıb.
Bu münasibətlə R.Həmidovun təhsil aldığı məktəbdə pedaqoji kollektiv ilə keçirilən görüşdə rayon icra hakimiyyətinin başçısı Rafil Hüseynov müəllimləri Novruz bayramı və əldə olunmuş nailiyyət münasibətilə təbrik edərək bildirib ki, Beynəlxalq Olimpiadada iştirak etmək böyük uğurdur.
R.Hüseynov qazanılmış nəticəyə görə təhsil şöbəsinə, məktəb rəhbərliyinə və fənn müəlliminə minnətdarlığını bildirərək diqqətə çatdırıb ki, Olimpiadaya hazırlıq Moskva Dövlət Universitetinin Bakı filialında aparılacaq: “Həmin təhsil ocağı ilə əlaqəni gücləndirib müvafiq proqram əsasında hazırlaşmaq zəruridir. Qarşıda hələ dörd ay vaxt var. Röyal üçün münasib şərait yaratmaq lazımdır ki, Olimpiadaya ciddi hazırlaşa bilsin”.
R.Həmidov göstərilən diqqətə görə minnətdarlığını bildirdi.
Görüşdə çıxış edən məktəbin direktoru Abusət Zeynalov, kimya fənni üzrə müəllim Namiq Abuşov, rayon təhsil şöbəsinin müdiri Astan İbişov R.Həmidovun Beynəlxalq Olimpiadada uğur qazanacağına əminliklərini ifadə etdilər.