Karateçi “Allah, Vətən, Kral” şüarını təhrif edib

Mərakeş məhkəməsi 18 yaşlı karateçi Yassin Belassalı bir illik şərti həbs cəzasına məhkum edib. Lent.az-ın “Associated Press” agentliyinə istinadən məlumatına görə, buna idmançının İspaniyanın “Barselona” klubunu Mərakeş kralından üstün tutması səbəb olub.

Belassal Mərakeşin “Allah, Vətən, Kral” milli devizini dəyişərək məktəbdəki lövhədə “Allah, Vətən, “Barselona” yazıb. Sonradan günahını etiraf edən uğursuz fanat daha ağır cəzadan qurtulduğu üçün sevindiyini bildirib.

Mərakeş qanunlarına əsasən, kralı təhqir edən şəxs 5 ilədək həbs cəzası ala bilər. Ölkənin istedadlı karateçisi sayılan Y.Belassal bu idman növündə gələcək karyerası ilə bağlı narahatlığını dilə gətirib. Onun fikrincə, yığma komandaya dəvət alması çətinləşəcək.

Artıq Mərakeş hüquq müdafiəçiləri məhkəmə qərarından narazılıqlarını bildiriblər. Onlar Y.Belassalın futbol klubuna məhəbbətində cinayət tərkibinin olmadığını iddia edirlər.