Bayram tədbirləri ilə əlaqədar olaraq bəzi yollar bağlanacaq.

ANS TV-nin məlumatına görə, bayram tədbirlərinin keçirilməsilə bağlı Dövlət Yol Polisi gücləndirilmiş iş regiminə keçir. Bakıda dövlət səviyyəsində keçiriləcək Novruz şənliklərilə əlaqədar bir sıra küçə və prospektlərdə hərəkət tam məhdudlaşdırılacaq. Bayram şənliklərilə əlaqədar sabah saat 7-dən paytaxtın Neftçilər prospekti istiqamətində kəsişən bütün küçə və prospektlərdə nəqliyyatın hərəkətinə tədbir tam başa çatanadək məhdudiyyət qoyulacaq.

Konstitusiya Məhkəməsi və Qoşa Qala qapısının önündən başlanan tədbir daha sonra İçərişəhər, Neftçilər prospekti, Dənizkənarı Bulvar boyu və digər yaxın ərazilərdə keçiriləcək.

Bakı şəhər Dövlət Yol Polisi İdarəsinin ictimaiyyətlə əlaqələr şöbəsinin rəisi Vaqif Əsədov bildiridi ki, paytaxtın “Azneft” dairəsində, Neftçilər prospektilə Yusif Səfərov küçəsinədək kəsişən bütün küçə və prospektlərdə avtomobillərin hərəkətinə tam məhdudiyyət qoyularaq istiqamət dəyidiriləcək.

Bunu nəzərə alaraq paytaxtın qeyd edilən hissəsinə doğru Bakı-Salyan yolunun 14-cü km-dən, 20-ci Sahə dairəsinə kimi. Eyni zamanda, Mikayıl Müşfiq dairəsindən, yəni Mikayıl Müşfiq küçəsilə, Mətbuat prospektinin kəsişməsinə qədər. Eləcə də Teymur Elçin-Mehdi Hüseyn, Yusif Səfərov-28 May, Yusif Səfərov-Afiyəddin Cəlilov küçələrinin kəsişməsindən və digər hissələrdən avtomobillərin hərəkətinə tam məhdudiyyət qoyularaq istiqamət dəyişdiriləcək.

Bölgələrdən paytaxta doğru gələnlər isə Bakı-Salyan yolunun 14-cü km-dən, 3-cü Kənar dairəvi yolla hərəkət edə biləcəklər.

Vaqif Əsədovun sözlərinə görə, paytaxtın Sumqayıt və Abşeron rayonlarından mərkəzə doğru hərəkət edənlər isə Tibliski prospektinin köməyilə, Neftçilər prospekti istiqamətində hərəkət etmədən, istənilən küçə və prospektlər üzrə sərbəst və fasiləsiz hərəkət edə bilərlər.

Paytaxt polisi sakinləri, sürücü və piyadaları, Novruz şənliyinə qatılmaq istəyən şəxsləri xəbərdar edir ki, keçiriləcək tədbirləri nəzərə alıb həmin istiqamətlərdə yalnız ictimai nəqliyyat vasitələrində istifadəyə üstünlük versinlər.

Mənbə
ANS TV: Nərgiz Tahirova