Naxçıvan, 16 mart, AZƏRTAC
Naxçıvan Muxtar Respublikasında əhali gəlirləri üzrə müsbət dinamika davam etməkdədir. Cari ilin yanvar-fevral aylarında muxtar respublikada əhalinin gəlirləri 2014-cü ilin müvafiq dövrü ilə müqayisədə 1,8 faiz artaraq 236 milyon 217 min manat, onun hər bir nəfərə düşən həcmi isə 0,9 faiz yüksələrək 536,7 manat təşkil edib.
Naxçıvan Muxtar Respublikası Dövlət Statistika Komitəsinin mətbuat xidmətindən AZƏRTAC-a bildirilib ki, 2015-ci ilin yanvar-fevral aylarında muxtar respublika iqtisadiyyatında bir işçiyə hesablanmış orta aylıq əməkhaqqının məbləği 391,7 manat təşkil edib və bu göstərici əvvəlki ilin müvafiq dövrünə nisbətən 3,9 faiz artıb.
2015-ci il fevralın 1-ə olan məlumata görə, muxtar respublikada əhalinin sayı bir il öncəyə nisbətdə 4425 nəfər və ya 1 faiz artaraq 440 min 101 nəfər təşkil edib.