Bakı, 16 mart, AZƏRTAC 
İqtisadiyyat və Sənaye Nazirliyinin Sahibkarlığa Kömək Milli Fondu Quba rayonunda sahibkarlardan prioritet hesab olunan sahələr üzrə investisiya layihələrinin qəbuluna başlayıb.
Nazirlikdən AZƏRTAC-a bildiriblər ki, martın 12-də Quba rayonunun Qəçrəş kəndində sahibkarlığın güzəştli kreditləşdirilməsi məsələlərinə dair keçirilən işgüzar forumda ixtisaslaşdırılmış “yaşıl market”in, müasir meyvə-tərəvəz emalı zavodunun, kiçik və ya orta həcmli bağçılıq təsərrüfatlarının, meyvə qurutma və plastik qapı-pəncərə müəssisələrinin yaradılması istiqamətində investisiya layihələrinin maliyyələşdirilməsi üçün təkliflərin qəbulu məqsədəuyğun hesab olunub. Bu sahələr üzrə nümunəvi layihələri Sahibkarlığa Kömək Milli Fondundan əldə etmək mümkündür.
Sahibkarların istəyinə əsasən kiçik həcmli investisiya layihələrinin dəyəri dövlətin güzəştli kreditləri hesabına maliyyələşdiriləcək. Martın 16-dan etibarən sahibkarlar investisiya layihələrinin maliyyələşdirilməsi məqsədilə müvəkkil kredit təşkilatları vasitəsilə Fonda müraciət edə bilərlər.
Əlavə məlumat üçün Sahibkarlığa Kömək Milli Fonduna müraciət etmək olar: Bakı şəhəri, Yasamal rayonu, A.M.Şərifzadə küçəsi, 172. Telefon: (012) 434-74-29, faks: (012) 432-37-17, e-mail: info@anfes.gov.az.