Moskva, 16 mart, AZƏRTAC
Azərbaycanın xalq artisti Polad Bülbüloğlunun “Şən Azərbaycan” mahnısı Moskva Dövlət Konservatoriyasının məşhur orkestrinin ifasında səslənib. Dirijor pultu arxasında isə 13 yaşlı Murtuza Bülbül dayanıb.
Bununla da, Moskva Konservatoriyasının əfsanəvi səhnəsi Bülbüllər nəslinin artıq üçüncü nümayəndəsini qəbul edib. Hələ ötən əsrin ortalarında dahi Bülbül bu səhnədən öz şahanə ifası ilə milyonlara “Vətənimdir” demişdi. Konservatoriyanın qocaman əməkdaşları Azərbaycan opera sənətinin banilərindən biri, unudulmaz sənətkarımız Bülbülün Rusiya paytaxtına səfərlərini, P.İ.Çaykovski adına Moskva Konservatoriyasında çıxışlarını məmnunluqla xatırlayırlar. Elə Bülbüllər nəslinin ikinci nümayəndəsi, Azərbaycanın xalq artisti, ölkəmizin Rusiyadakı səfiri Polad Bülbüloğlu da oğlu Murtuzanın dirijorluğu ilə Moskva Konservatoriyası orkestrinin müşayiəti altında “Gəl ey səhər!” mahnısını ifa etməzdən əvvəl çıxışında belə dedi: “Bu salonda dünyanın ən məşhur musiqiçiləri çıxış ediblər. Odur ki, burada olmaq, bu səhnədən çıxış etmək həm qürurverici, həm də məsuliyyətlidir”.
Konsertin aparıcısı, “İncəsənətə xidmətə görə” ordeninin sahibi, tanınmış dirijor Vyaçeslav Valeyev AZƏRTAC-ın müxbirinə deyib ki, artıq bir neçə ildir konservatoriyada uşaqlar üçün əyləncəli, eyni zamanda, maarifləndirici proqramlar hazırlanır. Səhnəyə gənc musiqiçilərlə yanaşı, ustadlar da çıxırlar. Belə ustadlardan biri də yüksək səviyyəli peşəkar, gözəl musiqi təhsili, musiqi duyumu, musiqi təfəkkürü olan Polad Bülbüloğludur”.
Murtuza Bülbüllə ilk tanışlığından söhbət açan dirijor dedi: “Murtuzanı ilk dəfə mənim yanıma anası Gülnarə xanım gətirib. Biz Polad Bülbüloğlu ilə uzun müddətdir əməkdaşlıq edirik. Gülnarə xanım isə 70 illik yubileyi münasibətilə oğlunun adından ona hədiyyə etməyi qərara almışdı. Mən də bu təşəbbüsə qoşuldum. Bakıda yubiley konserti zamanı Murtuza ilk dəfə dirijor kimi səhnəyə çıxanda atası gözlərinə inana bilmirdi. Bu gün də 13 yaşlı Murtuza Azərbaycan bəstəkarlarının əsərlərindən xüsusi olaraq onun üçün hazırlanmış proqramla konservatoriyanın səhnəsinə çıxdı. Musiqi aləmində müşayiətə dirijorluq etmək xüsusi ustalıq tələb edir. Murtuza bunu bacardı, çünki xasiyyətcə mübarizdir və onunla işləmək olduqca xoşdur”.
Mutuza da öz çıxışından razı qalmışdı. Nə salonun şan-şöhrəti onu sıxmışdı, nə də tamaşaçıların çoxluğu. Ancaq “bundan da yaxşı ola bilərdi” dedi: “Atamı müşayiət etmək olduqca rahatdır. O, dirijorun işini dəfələrlə asanlaşdırır. “Gəl ey səhər!” mahnısını hələ lap balacalıqdan çox eşitmişəm. Odur ki, bu günkü çıxışım heç də çətin olmadı, ancaq bundan da yaxşı ola bilərdi”.
Tələbkar Rusiya tamaşaçısı da Murtuzanın debütünü alqış və gül-çiçəklə qarşıladı. Moskva Konservatoriyasının səhnəsindən çox musiqiçilər sənətə vəsiqə alıb. Bu gün isə daha bir yeni Azərbaycan ulduzu parlamaqdadır.
Fəridə Abdullayeva
AZƏRTAC-ın xüsusi müxbiri
Moskva