Bakı, 12 mart, AZƏRTAC
Azərbaycan Dillər Universitetinin (ADU) Azərbaycan dili və ədəbiyyatı kafedrasının müdiri, professor Fəridə Səfiyevanın Polşa ali məktəblərində Azərbaycan dilinin tədrisi məqsədilə ölkəmizin Polşadakı səfirliyi və Varşava Universiteti tərəfindən Olşınka nəşriyyat evində İSBN kodu ilə nəşr olunmuş Azərbaycan dili dərsliyinin təqdimatı keçirilib.
ADU-dan AZƏRTAC-a bildirilib ki, Varşava Universitetində müəllim və tələbələrin iştirakı ilə keçirilən təqdimatda Azərbaycan Respublikasının Polşadakı səfiri Həsən Həsənov və səfirliyin əməkdaşları, görkəmli türkoloq Tadeuş Mayda, kitabın müəllifi Fəridə Səfiyeva iştirak ediblər.
Tədbirdə Azərbaycan-Polşa əlaqələrindən, Azərbaycan dilini öyrənən tələbələr üçün bu kitabın əvəzsiz bir vəsait olduğundan danışılıb. Həmçinin iştirakçılara kitab haqqında geniş məlumat verilib.
Bildirilib ki, dərslik Avropa məkanında ilk Azərbaycan dili dərsliyidir. Bu nəşr nəzəri materiallar, çalışmalar, dialoq və mətnlərdən ibarətdir. Nəzəri material sxemlərdə verilib. Bu da vizual yaddaşa əsaslandığı üçün mənimsəməni xeyli dərəcədə asanlaşdırır. Çalışmalar öyrənilən materialın möhkəmləndirilməsinə, söz ehtiyatının artırılmasına xidmət edir. Tərcümə üçün nəzərdə tutulan dialoq və mətnlər həm şifahi nitq vərdişlərinin yaranmasına, həm də Azərbaycanın tarixi keçmişi, mədəniyyəti, incəsənəti, adət-ənənəsi, musiqisi, görkəmli şəxsiyyətləri ilə bağlı məlumat əldə olunmasına kömək edir. Lüğət bölməsində kitabda verilən materiallara uyğun sözlərin tərcüməsi əksini tapır. Dərslik Polşanın mərkəzi və universitet kitabxanalarına göndərilib. Kitabdan Varşava Universitetində Azərbaycan dilinin tədrisində istifadə olunur.